英女王外孫女、安妮公主細女Zara Phillips尋日去咗香港傷健策騎協會旗下嘅公眾騎術學校參觀，睇一班有特殊需要嘅小朋友點樣用學騎馬嚟控制自己情緒。雖然只係參觀咗短短一個鐘，但Zara認為呢種活動好有意思，仲話從來都冇諗過騎馬可以達致咁嘅效果添！
Zara係馬術三項賽世界冠軍，佢覺得香港嘅馬場同英國嘅有乜分別呢？佢話從來都冇諗過市中心嘅地方會起馬場，覺得興奮又得意，但可惜嘅係今次訪港時間太短，唔夠時間畀佢試騎香港嘅馬匹，如果唔係就可以比較埋兩地馬匹嘅分別同優劣嘞！
其實Zara今日仲要繼續同銀行嘅職員見面同分享心得，聽日上機回程前，可以爭取半日時間遊香港。佢唔肯講會去邊，淨係話會盡量試吓香港嘅美食喎！