負責監管全港醫生專業操守嘅醫務委員會，一直被外界批評黑箱作業同偏幫公立醫生，對私家醫生同公眾都好唔公平。醫學會前會長蔡堅今年初透過參選醫委會主席，希望可以從內部挑戰同改革現有制度，但最後都係一如所料，輸咗畀連續第三度角逐連任、被視為親政府嘅麥列菲菲。
醫委會早前以謝鴻興漏報不小心駕駛紀錄為由，取消咗佢嘅直選委員資格，就畀人質疑係對醫學會唔聽話搞搞震進行嘅一次大報復。但有關決定最後被法庭裁定違憲，令謝鴻興可以恢復委員資格。
謝鴻興同蔡堅尋日再食住今次法院判決進行反擊，聯同醫療政策評議會召集人郭家麒召開記者會，宣布發動全港醫生網上聯署，爭取醫委會全面直選同要求麥列菲菲為呢次浪費公帑事件引咎辭職。有關行動擺明係新仇舊恨一齊來，醫委會同麥列菲菲都肯定有排煩。