政府尋日宣布委任白鴿黨主席「鐵頭仁」何俊仁、建仔嘅「橄欖」陳鑑林同偉易達集團主席黃子欣做機管局成員，任期由二○一○年一月一日至二○一二年十二月三十一日。其中黃子欣係已經執咗笠嘅甘泉航空嘅前董事，又係航空發展諮詢委員會成員，佢今次入局絕對唔令人意外。橄欖亦出名係政府嘅好朋友。最奇怪嘅係鐵頭仁嘅任命，一來佢係泛民第一大黨嘅主席，政府好少會有好嘢益佢，二來佢同航空業亦好似冇乜關係，三來機管局裏面現時已有兩名立法會議員、富貴黨嘅方剛同專業會議嘅何鍾泰，睇唔到有乜特別原因要再委任佢。
不過，有政界人士就分析，運輸及房屋局局長Eva鄭汝樺最近力推嘅廣深港高鐵項目，喺地區遇到好大阻力，其中白鴿黨好可能會投下反對票，雖然預計政府最後仍會夠票通過，但搞到咁緊張始終唔多好睇。
今次Eva搵本身嚟自新界西選區嘅鐵頭仁入機管局，就算未能令白鴿黨轉軚支持高鐵，亦可以為對新西居民有一定影響嘅深港機場鐵路同機場跑道擴建買定保險，希望該黨可以放佢一馬又好，甚至係推鐵頭仁出去做擋箭牌，起碼Eva唔使好似上次落村差啲被人掟菜，諗落真係除笨有精。