商場如戰場，行軍打仗最講士氣，恒基主席「四叔」李兆基深明呢個道理，不但論功行賞，近年每年年尾仲出錢請恒基發展嘅直系員工去旅行充電，但舊年就因為金融海嘯暫停一年。今年經濟回復暢旺，股市同樓市穩步上揚，恒地旗下樓盤「天匯」創天價佳績，於是宣布恢復年尾嘅員工大旅行。
恒地今年近近地去海南島三亞旅行，但絕對稱得上係超級豪華團，據聞四日行程每人要一萬元團費，入住當地最貴嘅萬豪酒店，全程食好嘢，享受陽光與海灘，總之保證食得招積同住得舒適，仲包埋每名員工一位親友同行添！
據講今次員工冬季大旅行會分兩團出發，分別在下月二十四日平安夜同三十一日大除夕兩日出發，恒基話呢兩個時段都係員工主要放假時間喎。