由舊水警總部活化而成嘅1881Heritage前日正式開幕，長實副主席李澤鉅同埋執行董事趙國雄以主人家身份主持開幕禮。「趙樓神」除咗講樓市，仲講埋打工仔添！
佢舉例話內地嘅人普遍務農，想賺多啲可出城打工，市道欠佳又可以返鄉下耕田，進可攻退可守；即使世界超強嘅美國，平日就由得墨西哥人去農場工作，一旦有需要時，又可利用反非法勞工條例，騰出部分工作機會畀番本地人。相反，香港打工仔就欠缺呢啲彈性，冇咗份工真係幾徬徨。
講完打工仔，佢又話過多兩年佢夠鐘退休啦，依家已度緊退休大計，其中一個打算係返內地養豬。佢話中國人係食豬民族，以中國龐大嘅人口計算大有可為，事關養豬除咗場地，最緊要做好衞生管理，否則一隻豬有事隨時成棚豬死晒，實血本無歸！睇嚟趙國雄唔係信口開河，對養豬業的確花過心思研究喎！