老實講，周一鑊此名由來就因為佢每周一鑊，淨係補鑊都補唔切，仲邊度得閒搞吖？實際上，佢曾經將呢條食物安全大法，即係《食物安全條例草案》擺上上屆立法會議程，仲計劃喺最後嗰個立法年度嘅下半年度交畀立法會審議。

既然係大法，咁對口嘅立法會食物安全及環境衞生事務委員會就組咗個英法豪華團，去考察當地嘅相關制度，之後又突然殺出三聚氰胺，呢條大法就冇再提嘞；跟住喺新一屆立法會組成後，嗰條賦予政府當局禁止進口同銷售，以及回收有問題食品，都拖到今屆首個立法年度先獲通過，已經夠慢啦！

議員考察團隨時被批嘥公帑

雖則係咁，周一鑊又將條大法排期喺上個立法年度嘅下半年提交，點知唔提、唔提又冇咗件事，竟然又喺今個立法年度嘅立法議程中見到呢條大法，又係排喺下半年度。

呢條大法一拖再拖，前後拖咗兩年，都唔知周一鑊係咪有心搞？但好明顯佢累街坊。因為佢將條大法一再押後，就好似推冧骨牌咁，其他嘢要重新嚟過。事關呢條大法橫跨兩屆立法會，上屆立法會相關事務委員會去完考察啫，但經過選舉洗牌後，委員會加入咗新成員，為咗準備審議呢條大法，佢哋又計劃出外考察嘞！

上屆立法會為咗呢條大法已使咗大筆公帑，周一鑊咁拖法，變相畀多次機會啲議員又用公帑外遊，唔單止又要使多筆公帑，委員會分分鐘仲會畀市民批評浪費公帑添！所以委員會有議員建議今次考察新加坡同澳洲，一來近啲，唔想畀市民批評又搞超豪團；二來係因為新加坡係華人社會，同香港比較接近，又因政府話澳洲嘅規管有參考價值，所以想去睇吓。