不過依家有個好好嘅體驗制水機會，趁住廣東旱情告急，後生仔可以去珠海住幾日。因為當地已緊急實施制水措施，連帶隔籬嘅澳門亦迫在眉睫，立即推出全民節水回贈計劃共渡難關。

正當珠三角鬧水荒嘅同時，一衣帶水嘅香港，按道理都應該居安思危至係o架。點知水務署似乎完全冇任何危機意識，好老定咁話存水量夠香港用半年，而且輸港東江水供應正常，未有受旱情影響，叫大家唔使擔心咁話。

叮佢個鎯鎯，唔擔心就假咯！內地專家對廣東旱情就唔係好樂觀嘞，依家雨季已經過咗，旱情只係剛剛開始，未知幾時至結束！事實上，受旱情影響，東江沿線嘅三大水庫可調度水量比去年同期少咗百分之五十，如果旱情持續到出年，可能會對供港構成影響。

仲有呀，知唔知全港水管嚴重老化成日漏水呀？本港每年水管爆裂事故高達二千宗，香港隨街都係噴泉，外國旅客唔知嘅，仲以為係落錯飛機，去咗泰國潑水節添。

水務署署長馬利德前排承認去年因水管滲漏而損失嘅食水，佔全年總供水量高達兩成，損失金額近七個億呀老友。叮！其實更換水管有幾難啫，竟然要等十五年咁耐？有冇搞錯呀！講到底，咪就係懶之嘛，水務署係都要拖得就拖，唔爆到鬧市變澤國都唔做嘢，認真抵叮！

最搞笑嘅係，水務署有口話人冇口話自己，明明自己係全港浪費食水大戶，反過來叫市民節約用水，提出水效益標籤計劃，希望二○三○年有關計劃全面落實後節省約一成用水！好心啦，水務署一年漏足兩成食水，搞幾多個標籤計劃都補唔番數啦！

話時話，香港暫時水頭尚算充足，完全多得粵港供水協議，既然係咁，好應該珍惜地球寶貴嘅資源。但審計署之前踢爆，原來水務署購買東江水計錯數，搞到要將買多咗嘅水倒落海，五年浪費十七億公帑都算嘞，問題係有水冇人用，有人冇水用，咁樣嘥水法，簡直係折墮！

不過唔怪得水務署咁離譜，事關公僕嘅標準零舍奇怪過人，呢嗱，煲呔曾講過「收入低過綜援先算係貧窮」，話唔定水務署啲官僚認為水塘存水量低過BB池水位先算告急！叮佢個鎯鎯，再係咁落去，遲早又會聽到四圍有人嗌「樓下閂水喉」都得嘞。