立法會研究雷曼事宜小組委員會尋日召開第二十二場聆訊，主要圍繞不獲回購嘅非迷債苦主問題。全場一聲不發嘅議員「象哥」黃定光畀睡魔急Call，初則釣魚，繼而去咗搵周公，變咗「睡象」。三個鐘後，佢精神奕奕咁步出議事廳，佢話其實有啲攰，因為前晚瞓得唔係幾好喎。
至於上月底已退出小組嘅方剛就話，要問嘅早已喺之前嘅聆訊問咗，加上今個年度有唔少濕滯法例，如最低工資同競爭法要處理，無謂分心啦，如果小組主席何鍾泰有需要，將來傳召銀行嘅時候都可以搵佢幫手。
依家雷曼聆訊已變成長期抗戰，月尾翻閹完證監會行政總裁韋奕禮，十二月中輪到財爺鬍鬚曾，將來更話要傳召埋銀行代表，真係天荒地老都唔掂，難怪委員一係就瞓、一係就走啦！