政商界喜事浪接浪，新世界發展尋日正式發出新聞稿，公布集團主席鄭裕彤長孫鄭志剛同舊年訂婚嘅未婚妻余雅穎會喺禮拜六共諧連理，當日早上先喺聖約翰座堂行禮註冊，晚上假灣仔會展大禮堂大排筵席。阿爺鄭裕彤同阿爸鄭家純終於望到飲呢杯新抱茶喇！
之不過，新娘子余雅穎向來低調，到目前仍未喺公眾場合曝過光，只知道佢係前跨國投資公司高層，但幾個月前已離職，疊埋心水嫁入鄭家做少奶奶。據聞鄭志剛工作太忙，不但要押後度蜜月，就算今次世紀婚禮籌備都要主力由未婚妻負責。
新聞稿仲預告今次婚禮保安嚴密，傳媒需喺指定範圍內採訪。據聞城中富豪名人兩個月前已陸續收到一對新人發出嘅橙色喜帖，喜帖設計簡約，並通知貴賓好友可以喺婚禮前去指定嘅兩間高級百貨公司認購結婚禮物，所有禮物會由專人送到鄭家府上，方便又快捷。