問到過完一年冷河期限嘅商務及經濟發展局前局長馬時亨，啱啱答應擔任中策集團嘅非執行主席，肥平話：「喔，我以為馬局長專做慈善活動嘅？」

肥平似乎意猶未盡，喺台上正式演講時，當講到特區文化政策時，指民政事務局兼管藝術同文物兩大文化範疇，所以古物古蹟辦事處一向都隸屬民政局之下，但喺○七年後，古物處被調發展局，仲形容「呢個係比較怪雞嘅安排」。擺明寸緊舊老細煲呔曾唔識文化兼冇文化啦！

有同學喺台下問佢點睇西九文化區遲遲未動工，依家仲曬緊草皮，肥平即刻好似火山爆發咁連珠炮發，批評依家嘅西九計劃閉門造車，「匿喺象牙塔做嘢」，仲話香港應該發展「大西九」概念，將視野放喺整個大中華同東南亞，而唔係香港呢個彈丸之地。肥平咁講，係咪寸緊政務司司長唐唐係井底之蛙呢？