日前將軍澳發生引致一死三十五人傷嘅恐怖車禍，前線醫護人員工作壓力大增，身為醫管局主席嘅胡定旭，呢兩日亦喺醫院間兩頭騰。但大家咪誤會，肥胡嘅專業係會計師，唔識醫人，佢喺醫院間咁頻撲，係分別去咗伊利沙伯醫院同將軍澳醫院探望傷者，佢見到傷者家屬憂傷不已，自己都好難過，呼籲駕駛者咪貪一時之快。
終審法院早前就公立醫院追討超時工作補水作出裁決，醫管局雖避過巨額賠水可能導致破產嘅厄運，但就要全面改革現行嘅醫生候召制度，都咪話唔煩。
肥胡尋日講起呢件事，形容係小事情，醫管局同醫生一向以和為貴，相信好易搞得掂，反而佢最近去探過將軍澳恐怖車禍嘅傷者，見到傷者嘅年老父母同稚幼子女，個個神情憂傷，睇到佢悲從中來，久久都未能釋懷。肥胡話，雖然自己揸車一向小心，加上有個跟咗佢十幾年嘅司機，但以後一樣會更加小心啲。