公開大學校長梁智仁嘅太座許安璞尋日出版第三本烹飪新書兼簽名會，同時宣布呢本係佢封筆之作，嚟緊唔會再出書，因為寫書壓力大，寧願周遊列國拜師學廚藝仲好玩。
老公梁校長當然有嚟撐場啦，但見佢一邊招呼嘉賓邊睇錶，似乎要趕下場喎。到底有乜約會緊要過老婆嘅簽名會呢？之唔係趕住去香港會「面試」囉。
原來梁校長近日遞紙申請加入香港會做尊貴會員，尋日首次會見遴選委員，行會成員張建東唔單止出面提名佢，仲陪埋佢去見Board，所以梁校長撐咗老婆大半粒鐘後，就急急腳直奔香港會。咁都冇法㗎！為咗撐老婆，兩頭騰都要啦！
香港會出名難入，候選人要輪流會見二十二位遴選委員，梁校長就見咗香港會現任主席陳祖澤等人，「面試」大約四十五分鐘。梁校長話冇乜尖銳問題，主要係傾吓偈，互相認識吓喎。
查實出身富裕嘅梁校長，早已係粉嶺高球會、馬會同鄉村俱樂部嘅尊貴會員，不過話晒香港會會員係身份象徵，畀十幾萬攞多個會籍又何妨呢？