下禮拜三係立法會議員「肥仔明」李華明結婚二十五周年，佢請咗多名黨友出席迷你派對同太太慶祝。將喺下月再婚嘅涂謹申就慨嘆肥仔明轉眼結婚二十五年，佢就要由頭計過，都唔知有冇咁長命捱到銀婚紀念。
「高達」李永達憶述同現任太太陳樹英都係喺八四年結婚，但肥仔明就立即窒佢，話高達同阿樹中間曾經離過婚，根據立法會計算議員資歷嘅準則，一旦中途落咗車，就要重新計過，唔算結婚二十五年。
肥仔明話下禮拜三立法會冇乜爭議性議程，如無意外，傍晚七、八點鐘就收得工，唯一擔心係煲呔曾會喺當日去立法會發表聲明公布政改方案，咁佢個銀婚派對就唔知點算好。
佢又透露當年原定喺十一月十一號註冊，貪個日子夠晒易記，可惜最後排唔到期，要順延一個禮拜。阿涂今次揀咗喺十二月十二號中午十二點註冊，希望佢唔會因為大頭蝦而誤咗吉時啦！