佢尋日帶埋班助理台長同科學主任去一個午宴，又再把握機會發揮佢嘅口才，落力介紹天文台各款測量儀器，十足十top sales咁，連班下屬都被佢感染sell埋一份，成條team就好似追緊target嘅hard sell兵團咁。

最近廣東旱情持續，李台長自然要講吓本港未來嘅降雨量如何，同埋香港會唔會重演「樓上閂水喉」、即係制水嘅危機啦，但佢只係話喺全球暖化嘅影響下，睇嚟除咗減少空氣污染同用少啲膠袋之外，係時候轉主題，即係慳多啲水嘞！呢方面就要靠官、商、民三方合作喇！

掌握唔到市民脈搏

有乜措施可以慳水呢？佢冇講，但三扒兩撥就轉咗話題，講天文台嘅儀器點樣威水，無論新儀器定舊技術，佢都搬晒出嚟添！好似曾經喺上年奧運馬術賽時用過嘅「暑熱壓力測量系統」、已喺全港十七區裝設嘅「自動氣象站」、「能見度儀錶」，同埋啱啱喺大潭灣裝好嘅「氣象浮標」等，佢都巨細無遺咁解釋畀記者聽。佢sell得咁落力，佢班下屬都拎番喺機場嗰套「雷暴預測系統」出嚟翻sell。

李台長對天文台嘅各種儀器真係好熟悉，但當記者問到有關市民中暑或降雨量等數字，佢就當堂「O晒嘴」，只係話佢早排曾經喺blog裏面寫過有關數字，叫記者去佢個blog度睇番喎。

雖然佢可能仲未摸清楚記者想要啲乜嘢，但都應該掌握市民嘅脈搏，事關市民唔會識用天文台啲儀器，只會關心天氣變化呢啲切身嘅問題，但一講到呢啲數字，李台長就露晒底。台長係咪應該惡補吓呢？佢總唔能夠下下同市民講「去我個blog度睇番啩！」