小白觀點:煲呔曾應捱刀幫港人擋煞
將軍澳發生巴士特大意外,死傷枕藉。依家社會真係危機處處,一時爆滅火筒,一時亡命小巴,香港人每日身處喺真實嘅恐懼鬥室入面,比電影世界恐怖一百倍!
大家有冇發覺,自從煲呔曾一人得道之後,雞犬冇錯全部升晒天,但怪事特別多,連昂坪三碌拎都跌埋落嚟。唔好話小白老弟迷信呀,反正依家內地啲官員流行整容,如果煲呔曾真係為咗香港人好,希望佢下次上京述職時順手執執個樣,受幾刀當幫香港人擋血光之災都好吖。
就算咁唔好彩手術失敗,變成錦鯉咁樣都冇所謂,搵個麻包袋笠住個頭,上面畫個二十世紀少年手印,小市民當佢神咁拜都有之。
網友觀點...X)...
[ 怪醫秦博士 ]
17歲嗰個女仔死得唔抵呀!體無完膚……唉!運輸署,睇緊啲啦~
[ jigsaw ]
唔好講話死咗嗰個女仔吖,其他人傷勢都唔輕,邊有人估到坐巴士會搞成咁?今次實係人為意外啦。
[ Mini cooper ]
揸公共車輛司機應該有職業操守,唔開快車,成車人命喺你手,一定要嚴懲危險駕駛!
[ Yiu ]
夜晚亡命巴士、小巴真係開得特別快o架,個個都好似車手上場咁,都係坐地鐵保命仔緊要!地鐵開通宵啦!
網址:www.sunsiupak.blogspot.com
阿豪觀點:嚇窒恐怖分子港得保安全
將軍澳恐怖巴士翻側意外,釀成一死三十多人受傷嘅慘劇。意外固然無可避免,但聽講出事路段設計有問題,轉彎位時速限制竟然係七十公里,之後好快又降低到五十公里,咁講法呢單嘢係咪有少少「人禍」嘅味道呢?
其實唔單止係路牌設計混亂嘅問題,就以危險駕駛導致他人死亡嚟講吖,多年嚟有邊個真係被重判過呢?仲有呀,事發後大家都見到其實救護資源好唔足夠,有「爆骨」傷者要等兩、三個鐘頭先至獲醫生診治。「奪命狂巴」事件揭發本港多個安全隱患,難為班高官仲成日吹噓話香港係「全球最安全城市」喎,梗係啦!恐怖分子去目標地點途中隨時領嘢,仲邊夠膽搞我哋吖!
網友觀點...X)...
[ 匿 名 ]
單嘢真係好恐怖,希望死者得到安息,傷者快啲康復……
[ 杜 杜 ]
政府成日話要重罰危駕嘅司機,但每次有致命大車禍,司機都係輕判一兩年就算,咁邊會有阻嚇力呢?
[ 尖 子 ]
見到報紙電視啲畫面真係恐怖,以後出街唔通真係只可以行路?
[ 朱標精 ]
以後搭巴士都係揀下層坐穩陣啲,如果有安全帶嘅話記得攬緊添呀!
網址:www.lukchiho.blogspot.com