過咗千幾年，如果杜甫翻生嚟特區望一望，成班高官餐餐飲紅酒、食牛扒，朱門依然係酒肉臭，雖然路上唔見有人餓死，但如果大詩人知道原來香港貧窮人口已經飆升到一百二十幾萬人，幾乎每六個人就有一個窮到三餐不繼，呢句「路有凍死骨」一樣擲地有聲。

之但係對於無心無肺嘅高官嚟講，見到本港愈來愈多市民生活水深火熱，竟然完全唔當一回事。鬼咩，事關當局用已經摺埋嘅扶貧委員會定下嘅二十四項指標監察貧窮情況，又用僅僅夠生存嘅概念界定貧窮，難怪煲呔曾好涼薄咁話，收入低過綜援先算係貧窮。

立法會福利事務委員會尋日開會討論，有議員發炮狂轟二十四項指標係垃圾標準，根本解決唔到貧窮問題，又批評依家嘅綜援計算準則唔切合現實情況。再講，就算當局真係要用呢啲指標，亦好應該設下貧窮線至係o架。有立法會議員講得啱，唔通要人瞓喺街邊，餓瓜咗先叫窮？仲要用捱餓人士嘅開支水平檢討綜援，真係荒謬絕倫！

唔係講笑，本港嘅堅尼指數高達四十三點四，係全球貧富懸殊最嚴重嘅地區。貧富懸殊惡化成咁，對於一個先進嘅經濟發展地區嚟講，簡直係奇恥大辱，難為成班高官成日自吹自擂「紐倫港」！

叮佢個鎯鎯，勞工及福利局局長張建宗唔單止冇正視貧窮問題，反而死撐煲呔曾，大玩概念遊戲，指堅尼指數係指市民收入差距，同貧窮問題唔同，又話政府家陣已大力推動經濟創造就業。叮，直情係狡辯。

好心唔好再死撐啦，係人都知政府有幾涼薄o架啦，把口就話利民紓困，但只要睇吓施政報告對扶貧隻字不提，只係識得講埋啲遠水不能救近火嘅六大產業，就知政府係幾咁漠視窮人。

事實上，本港貧窮人口不斷增加，九七年約有二十八萬人攞綜援，但十年後急增至近五十萬人，弊在政府當年削減綜援一成一，依家庫房水浸又唔加番，仲算死草咁諸多藉口諗住凍結添，唔通咁就係「利民紓困」？

叮！政府依家唔係話冇錢o架，只不過想佢雪中送炭就唔使旨意嘞，但對公務員自己友錦上添花就勁鬆手，閒閒地百幾二百萬年薪請副局長，紀律部隊又可以變相加薪。嗱，呢啲咪係親疏有別囉，窮人想脫貧？真係遙遙無期咯。

冇計啦，鬼叫煲呔曾同埋成班高官「飽漢不知餓漢飢」，根本唔知民間疾苦咩！就算有朝一日佢哋見到街邊真係有人攤咗喺度，都以為係「路有飽死骨」咋。