非請勿進後果自負

小白觀點：

水警慶祝小艇隊成立三十周年搞開放日，大家係咪好想參觀嗰艘可一次過載三十個阿蛇嘅水警輪有幾豪華呢？大家可以死咗條心，因為個開放日淨係招呼水警自己友圍威喂。奇怪嘞，飛行服務隊搞開放日，明明開放畀公眾入去㗎，為乜水警有好嘢唔同大家分享呀？

咪多得本報眼利囉，容乜易喺小艇隊上搵到蝦殼蟹鉗，又有幾個Chardonnay吉樽碌嚟碌去，要再勞煩警察公共關係科作古仔就無謂啦！不過今次用番同一個藉口，話係「就如何打擊非法入境者的堵截行動作實地視察和商討部署工作」，可信性就高得多咯。唔信？試吓撞入水警開放日吖，肯定當你係非法入境者查辦呀！

網友觀點......

船長

水警搞親活動都係圍威喂㗎啦，海鮮團畀傳媒影到先至出奇。

Desmond

叫乜鬼開放日吖，即係畀個藉口自己人隊酒開party，我都要投考水警喇！

鯊魚飛

喔，呢排水警只當魚蝦蟹係非法入境啫，小市民冇事嘅，連走私都冇事，因為水警掛住捉魚蝦蟹落肚送酒，唔得閒。

Shirley

乜開放日冇海鮮團嘅咩，咁唔去lu！

網址：www.sunsiupak.blogspot.com

不知悔改怒刮內鬼

阿豪觀點：

水警醜聞浪接浪，繼開「海鮮美酒工作會議」後，又被踢爆將「開放日」變做「家屬同樂日」，明明可以藉機向市民介紹水警工作，點知咁都要益自己友，只有新舊同袍同佢哋嘅子弟至有幸登船參觀，有冇搞錯？

不過唔好話豪伯唔提醒有幸上船參觀嘅朋友，千祈唔好以為過癮呀，隨時出事㗎嘛！呢嗱，自從警官歎海鮮事件曝光後，有關人等第一個反應唔係檢討吓自己，而係諗：明明好低調㗎啦，點解都畀人踢爆呢？擺明係自己人告密啦！聽講家陣水警內部一片「白色恐怖」，個個都擔心自己被牽連。日後再有咩負面新聞，你哋上過水警輪參觀，分分鐘可能成為被懷疑對象！

網友觀點......

小四子

啱㗎喇，政府專搞小圈子選擇㗎嘛，水警開放日，梗係益自己友嘅小圈子開放日啦！

Maymay0505

真係完全唔知有呢個開放日喎，小市民完全唔知情，點會有人去？唔怪得變成私人開放日啦……

海鮮王

無記應該開拍番套《富貴水警門》，介紹警隊執行公務之餘，仲有呢啲不為人知嘅福利。

傻仔

雖然請我都未必會去睇，但係你淨係畀自己友參觀，我條氣就唔順！

網址：www.lukchiho.blogspot.com