煲呔曾上個禮拜請全體立法會議員去禮賓府午宴，除咗佢嘅「曾朋友」、經濟動力嘅梁劉柔芬冇去之外，原來同一個政團嘅另一個「曾朋友」林健鋒（Jeffrey）都冇畀面出席。睇番立法會秘書處嘅紀錄，先知原來佢喺今個月三至八號請咗假。
放假去邊？原來Jeffrey同咗幾個商界朋友去韓國參觀唔同企業嘅科研同企管部門，期間有個鍾意食韓國菜嘅朋友提議，話去到南韓不如學吓整韓國菜，佢聽落覺得唔錯就去學埋一份。佢哋幾個大男人，一日就學識整韓式牛肉同醃泡菜，佢話韓國菜不外乎將啲嘢「撈嚟撈去」，所以都唔難掌握喎！
Jeffrey仲自爆以前喺美國讀書時，一日三餐都係自己搞掂，依家如果工人放假嘅話，佢都會親自下廚。咁有乜拿手好餸呢？佢點都唔肯講，但就話喺韓國帶咗啲泡菜返嚟，醃好之後可以大家一齊食喎！