前朝立法局喺臨回歸前參考醫委會組成，修例為護士管理局引入六名業界直選委員，但當局遲遲都未為相關嘅選舉同上訴程序制訂規則，令法例形同虛設。前衞生福利及食物局局長楊永強曾經喺○三年初，承諾喺該年內落實有關規則同選舉，但楊永強其後因沙士下台，接手嘅食衞局局長周一鑊就再冇跟進，至今拖足十二年都未有落實時間表。
護管局現任主席汪國成名義上喺去年底先上任，但實際上佢之前已經做過呢個位多年，其後受制於政府嘅「六六規定」，先至迫於無奈卸任。估唔到汪國成隔咗幾年過咗一陣冷河，又獲政府「翻閹」重掌護管局，令唔少醫護界人士非議。
本身都係護管局委員嘅立法會衞生服務界議員李國麟，聽日會喺立法會就護管局嘅組成同委員任期提出質詢，為業界要求改革護管局嘅戰事打響頭炮，估計之後仲會陸續出招。
阿麟強調自己已喺局內提過政府從速落實護管局直選，但等咗幾年都冇正面回應，先至決定爆周一鑊大鑊。佢又自爆仲有幾個月就任滿六年，預咗喺護管局冇得留低，自然可以鬧得放啲。