話說會議去到尾聲嘅時候，小組委員會主席劉秀成率先出招提問，有冇可能搬走駐港解放軍部隊，以騰出海濱用地，其他議員唔等劉秀成問完就已經插嘴，笑主席真係好勇。

無得食飯 焗食三文治

跟住陳偉業就建議起兩條橫跨維港嘅行人天橋，一條由中環去西九、一條就由銅鑼灣去啟德，若果起唔到橋，就起隧道喎。林鄭聽完都話最近確實收過同類建議，技術上同商業上都係可行嘅，如果議員認為有得諗，發展局都可以研究吓。

之後，李永達竟然投訴租唔到私人管理嘅公共空間同康文署場地搞活動，質疑有人驚佢哋租場嚟「跳脫衣舞、放飛劍」。咁都問得出？林鄭話康文署唔係佢管，但公共空間管理指引就快出爐，相信可以改善問題。會議結束後，問林鄭去邊度食晏，佢話太忙冇飯食，返寫字樓食三文治喎！

班議員忽然天馬行空，睇怕都係想用盡啲時間，反正會議時間定咗係咁多，有剩咯咪好似唧牙膏咁唧盡林鄭囉！