商務及經濟發展局前局長馬時亨離開官場後搞作多多，尋日佢去咗理大同學生分享夢想與成功之路。肥亨演講時話做人有夢想好緊要，尤其喺職場，有夢想先有推動力做好每一份工作。不過睇嚟唔係個個大學生嘅夢想都咁「職業化」，一去到答問環節，現今青少年到底關注啲乜就現晒形。
有位男同學開宗明義問肥亨攞投資貼士，肥亨聽到問題後呆一呆，然後大笑五秒，相信係唔知點答呢位同學嘅問題，拖得一秒得一秒。肥亨最後都只能交行貨，叫同學唔好用學生貸款去炒股，投資前定要做足功課。
點知之後嘅問題仲難答，有女同學問佢專注事業好定嫁個有錢人好，肥亨聽完後差啲出唔到聲，最後話個個人嘅優勢都唔一樣，大家都係睇番自己嘅強項嚟決定路向好啲。能言善道嘅肥亨都爭啲畀班同學考起，睇嚟佢日後再去呢啲講座，都係做定啲「另類功課」先嘞！