富貴黨前副主席「莎姐」周梁淑怡大女周智美喺○七年已誕下大女余心予，而莎姐細女智琪就喺今年六月誕下六磅半嘅女嬰，估唔到話咁快莎姐又再抱孫。大女智美喺禮拜日誕下六磅重嘅男嬰（圖），足足早咗九日出世。由於兩個女都習慣唔會事先知道BB嘅性別，諗住等到小生命降臨嗰一刻先知，今次智美為囡囡添咗個弟弟，仲係周家首個男孫，周家上下定必十分高興。
莎姐兩個外孫女都有一雙水汪汪嘅大眼睛，莎姐見親都嗒晒糖，男外孫都唔例外，有一對迷人嘅電眼，但就好明顯係男仔嘅相貌。
莎姐唔做立法會議員都夠晒忙，雖然佢唔識湊BB，但就好鍾意去探BB，同佢哋玩。兩個女生BB，佢都有請陪月幫手，仲講笑話佢可以做嘅，咪就係陪嗰位陪月囉。
