政府規劃唔好，搞到天水圍變咗悲情城市，家暴問題日趨嚴重，既分享唔到經濟帶嚟嘅成果，舊年仲受到金融海嘯摧殘，市民嘅生活壓力大到爆煲，而政府早年搞咗社區投資共享基金，希望鄰里互助同種族共融，尋日仲搞咗個論壇講點樣對抗逆境，張建宗當然唔敢失場啦。

其實，好多記者已到場「恭候」，等佢致辭完離場，即刻包圍佢。點解？追問有關屯門勞聯中心爆滅火筒傷人事件囉！佢不斷解畫，話已經同勞聯嘅立法會議員李鳳英聯絡過，跟住又話會同僱員再培訓局跟進，特別係器材嘅安全。

咪以為解完畫就可以走人，第三單又燒埋嚟。尋日凌晨發生巴士車禍，造成幾十人死傷，呢瓣亦關佢事。記者追問點樣幫啲死傷者，佢寫晒包單咁話社署會做好跟進，一定會協助所有受影響人士咁話。係真唔係？咁就要放長雙眼睇清楚嘞！

黑狗偷食 白狗當災

跟住佢又趕去立法會出席福利事務委員會會議，會上討論離院長者綜合支援試驗計劃、綜援金額同貧窮定義，佢簡直變咗箭靶，就因為佢老闆嗰句收入低過綜援先係貧窮，同埋話下年可能凍結綜援金額，畀議員剷到上天花板。

畀議員鬥當然唔好受，有議員仲加多腳，話一個慳電膽就隊冧煲呔曾，如果堅尼系數冇咁大差距，市民冇咁大怨氣，對煲呔曾就冇咁大影響。

勢估唔到明明唔關佢事，都要入埋佢數，呢啲係咪黑狗偷食，白狗當災呢？口口聲聲話團隊精神吖嘛，惟有硬啃老闆煲呔曾「親家膽」醜聞落肚啦！

好多議員早前大讚張建宗係最好嘅推銷員，好似尋日咁，一朝早就「關佢七事」，咪話去推銷政策啦，補鑊都嚟唔切呀！