呢嗱，行會成員張炳良同鄭耀棠近排先後就是否復建居屋同恢復定期賣地同港府唱反調，政府有政府講，佢哋有佢哋噏，七嘴八舌，七國咁亂，叫市民聽邊個先？

唔怪得另一位行會成員夏佳理睇唔過眼，忍唔住批評部分行會同僚違反集體負責制。正如夏佳理話齋，行會規矩寫得清清楚楚，任何行會已經通過嘅政策，無論官守定非官守成員，都必須統一口徑支持，個人背景同環境都唔可以成為違規嘅藉口。

叮！港府定落嘅遊戲規則，行會成員帶頭唔遵守，諗都唔諗會有乜後果，鍾意噏乜都得。如果其他官員有樣學樣，各有各講，咁搞法，港府仲有乜管治威信吖？

係人都知，呢個弱勢政府同隻跛腳鴨差唔多，愈來愈得唔到市民支持同信任。無他嘅，因為自上而下個個淨係識諗縮數，連煲呔曾自己亦係醜聞爆完一鑊又一鑊。淨係施政報告發表以來，佢已經先後爆出「慳電膽益親家」同「雷曼弟婦提早獲賠償」嘅醜聞。

更弊就係，連串利益衝突嘅醜聞被踢爆之後，煲呔曾不但冇反躬自省，仲砌辭死撐，甚至反咬一口，話傳媒「無中生有」、「惡意中傷」，開咗政府高官打壓新聞自由嘅惡例。

叮！煲呔曾其身不正，搞到個個上行下效，只顧個人同部門利益，視民意如浮雲，港府施政有乜辦法唔亂，民望又有乜辦法唔插水吖。

嗱，港大民意研究計劃嘅調查結果顯示，市民對港府不信任比率比八月份急升咗成倍，達到兩成八。煲呔曾好明顯已經變咗「不受歡迎人物」，呢啲咪叫現眼報囉。

香港得個「亂」字，政府決策亂、施政亂、訊息亂，冇樣唔亂。依家除咗逼到埋身嘅豬流感疫情之外，好多具爭議性、更棘手嘅議題仲未解決，好似政改方案、最低工資立法、醫療融資計劃等等。如果跛腳鴨政府繼續渾渾噩噩，唔徹底改善施政，咪講話創新天吖，煲呔曾能唔能夠維持有效管治，做埋呢兩年幾任期，睇怕都要打個大大嘅問號。叮！