於六六年加入九鐵的區忠，由操作員慢慢升任為副車長再升為車長。他操作載客列車外還駕駛貨運列車，來往中港各站，「最記得係六十年代末，火車北上時被一班內地農民截停，夾硬走上嚟掛幅領導人嘅畫，仲喺架車上面寫革命字句，要我跟住讀『聽從黨命令』。」

車長北上自備《毛語錄》

事後九鐵為免再被塗鴉，改派塗滿機油的貨運列車北上，「架車叫『大花面』，就算佢哋亂畫，架車亦上唔到色。」區忠憶述，各車長之後都自備一本《毛語錄》，才通行無阻。

一九六七年起，內地掀起偷渡潮，他說：「嗰陣時有七個偷渡客，誤打誤撞匿入架裝滿辣椒乾的密封貨卡度，那時天熱，太陽一曬成架貨卡都充斥辣椒味，七個人監生辣死；亦有偷渡客入咗雪卡凍死或凍傷。」區忠稱，貨運列車未埋站，偷渡客以為抵達目的地，從氣窗爬出，「佢哋見嘢就捉住借力，點知抆住條高壓電纜，咁就電死了。」貨運列車即將停駛，區忠並沒有依依不捨，反而很理智地說：「時代在進步，貨運列車係要淘汰㗎啦。」

「呢啲柴油火車頭係港人嘅集體回憶。」香港鐵路會前會長劉棟遠稱，現時仍有四頭柴油火車運作，自港鐵停用貨運列車消息傳出後，火車迷近日不時到東鐵沿線拍攝貨運列車相片留念。