小白觀點：入鄉隨俗融入睡衣文化

上海加入戰圈大搞迪士尼樂園，好多人認為上海建園擺明同香港爭生意，實在太過小人之心喇，其實可能係香港報仇雪恨嘅機會都唔定。

美式文化已經唔係好吃香，呢，一向打乖乖牌嘅米奇老鼠商品近年銷量大跌，當然啦，「老鼠不壞，小孩唔買」吖嘛，華特迪士尼於是想將米奇嘅形象改得自私一啲。咁啱晒啦！香港人成日當美國人神咁拜，等上海畀老外領教一下中華文化大熔爐嘅厲害都好。

迪士尼一跌入呢個熔爐，想唔入鄉隨俗變得更劣質都難，以後卡通角色融入上海睡衣文化，喺美國小鎮大街周圍踎，一邊咬住支煙一邊等運到。哼！美國霸權？我呸！

網友觀點...X）...

[　米老鼠　]

之後連自由行都唔去香港迪士尼樂園啦，仲講咩擴建振興旅遊吖！

[　sammy　]

香港咁就做咗傻仔，人哋上海嗰個實大好多！

[　May　]

咁搞法，米老鼠都要變成過街老鼠，樂園變廢墟！

[　高飛　]

依家香港迪士尼樂園應該趁機減價賣大包，遲啲冇人去仲蝕入肉呀。唉，我哋納稅人嘅錢就咁揼晒落鹹水海。

阿豪觀點：港迪士尼啱晒商務旅客

要嚟嘅始終要嚟，傳咗好耐嘅上海迪士尼終於正式落實，預計最快二○一四年落成，面積比香港嗰個大成倍幾！都係我哋啲高官夠淡定，商務及經濟發展局長劉吳惠蘭話喎，中國市場龐大，相信容納兩個迪士尼綽綽有餘喎，又話兩個樂園可以互補同合作喎。

咁又係嘅，上海迪士尼將會係全亞洲最大規模，香港迪士尼就係全世界最細，針對嘅並非普通顧客，而係一啲高質素嘅商務旅客，因為香港迪士尼設施少，加上唔使點排隊，可以好快玩晒，絕對適合日理萬機嘅成功人士！再唔係一不做二不休，建議迪士尼開到好似便利店咁，梗有一間喺左近，實行一拍兩散大家冇運行！

網友觀點...X）...

[　萬佳美　]

香港迪士尼自己搞得唔好玩、又細，本身已經唔掂，唔好賴人哋上海起多個同你競爭啦！

[　無聊人　]

與其同人哋嗰啲主題公園鬥大，倒不如宣傳吓有香港特色嘅景點啦，地質公園對遊客應該有吸引力……

[　勤仔　]

當初一早知道中國會有第二個迪士尼樂園，就唔使寫埋晒啲喪權辱港嘅條款啦！

[　真卜勤　]

香港迪士尼都有特色，就係冇人去囉。勝在唔使排隊，全世界邊度搵？