食物及衞生局副局長梁卓偉尋日喺大氣電波為呢個諗法解畫，被問到過身後會點處置自己嘅遺體，佢就毫不猶豫咁話自己一直喺醫學院度做，年幾前至做咗依家呢份工，所以好明白醫學院有搵遺體做研究同畀學生學習嘅需要，因此佢希望過世後遺體可做呢啲用途，希望可以幫得到佢哋喎。咁即係佢願意畀學生「劏屍」啦！

至於工廈改建骨灰龕措施，佢覺得唔應該由一、兩個區照顧晒全港嘅靈位需要，話咁係唔公平同負荷唔到，所以過去四、五年，佢哋都同過五、六個區議會傾過，暫時只係得和合石橋路可落實提供約四萬個骨灰位，所以依家要視乎當區居民嘅睇法同地理位置許唔許可，其次係部分商業同商貿用地可唔可轉變土地用途，所以仲要同其他部門研究。