香港友好協進會早前喺深圳舉辦港區全國人大同政協活動日，唔止見識到由4L成立嘅經濟動力兩名核心林健鋒同梁君彥嘅高爾夫球好球技，仲見證到佢哋多咗一名成員。
初時以為佢哋講笑，問清楚後先知係真嘅，全國政協委員盧文端已正式加盟，大家講心，連交會費同申請表都慳番。「盧」嘅英文都係「L」行頭，經濟動力之內嘅「L」字輩又添一名成員。梁君彥話嚟自工商界嘅盧文端可以將商界意見帶入經濟動力，集思廣益，而盧嘅囝囝盧金榮同女婿都係年輕人，啱晒經濟動力口味。
經濟動力為大學生舉辦嘅名人講座，已經舉行咗三場，聽聞佢哋最近情商到新鴻基地產副主席郭炳江開金口，地點喺中文大學，日期待定喎！
