少搞政治少應酬

沈祖堯半世埋首醫學研究，冇乜人會質疑佢喺學術嘅成就，講到施政風格，暫時外界反應亦算正面。但一個銀有兩個面，佢過往專注學術、少搞政治少應酬嘅優點，可能成為佢晉升校長後嘅死穴。

立法會議員陳克勤係中大校董會嘅校董，最近佢用電郵方式收集中大校友對沈祖堯就快做中大掌舵人嘅意見，發現唔少校友都指現任校長「膠樽義」劉遵義入主中大後，近年施政引起學生爭議，但膠樽義嘅政商界人脈深厚，籌募經費能力強，亦係不爭事實。相對嚟講，沈祖堯一向低調，擔心佢揸慣聽筒，唔慣揸鐵錘揼人心口，背後又冇商界大水喉射住，慢慢會令中大水塘乾涸，影響中大長遠發展。

今時今日喺香港做大學校長好難，籌款能力確實不容輕視，如果校方經費不足，發展寸步難行。所以，克勤仔話會喺下禮拜二嘅校董會向沈祖堯轉達校友心聲，希望沈祖堯講解一下未來為校方籌款嘅腹中大計咁話。

咁即係要沈祖堯交代有邊啲水喉，同埋究竟有冇鋪定大堆地底輸水管囉！睇吓到時佢點拆招。