秋風起，令人諗起大閘蟹。素來鍾意炒蝦拆蟹嘅金融服務界議員「金勞詹」詹培忠，前晚約埋四位同佢一樣喺一九九一年加入前立法局嘅老友記，一齊去擦大閘蟹。
白鴿黨張文光、李華明、李永達同涂謹申，前晚應邀同金勞詹撐枱腳。聽聞呢餐蟹宴約咗好一段時間，但一拖再拖，搞到前晚先食得成，席間成班九一議員把酒言歡、風花雪月，連二○一二年特首跑馬仔都提及到。
除咗佢哋之外，劉慧卿都係九一年入局。有飯局中人話，一來Emily同金勞詹素來冇乜兩句，二來Emily唔鍾意人哋講炒蝦拆蟹嘅粗口，席間大家飲多咗兩杯，粗口橫飛激親佢就無謂啦！不過，喺度提醒幾位資深議員，大閘蟹好高膽固醇，咪亂擦呀！