林鄭嘅簡報全長超過半粒鐘，內容猛咁強調活化工廈有乜好處，但其實講嚟講去得一招，就係唔收錢，要將未統一意向更改用途嘅工廈納入計劃有難度，反建議業界用創意方案解決混合用途問題，例如可以互換單位，將工業用途集中喺決定唔改用途嘅工廈，以免趕絕工業。

講到呢度，佢突然爆一句：「希望大家唔好上街搵我投訴！」全場為之愕然，林鄭就好爽直咁接住話：「係呀，我好現實㗎！如果推咗政策，仲日日有人上門搵我就唔好啦！」

煲呔曾搞乜都衰，早前仲接連捲入涉嫌「慳電膽益親家」同「雷曼弟婦」醜聞，呢排每逢假日都有好多團體去禮賓府同政府總部鬧爆佢，唔知係咪前車可鑑，所以林鄭先咁講？雖然好多人話林鄭係「好打得」嘅局長，但原來佢仲「好踩得」，連老細都夠膽踩！煲呔曾咁小器，林鄭因住有手尾跟呀。