雖然何教授唔再係校長，但仍出任城大商學院經濟及金融系金融學講座教授，講起當前經濟局勢，佢都有感而發，話早於兩、三年前即金融海嘯未發生前，已提醒身邊朋友唔好再揸美金，應轉買外幣，理由係美國印銀紙太多，加上借貸過度令美國房地產市場急速膨脹，遲早爆煲，可惜當時冇人聽佢講，仲話佢傻，但何教授唔理咁多，一於將部分身家轉買歐元。今時今日睇番轉頭，歐元已有近兩成升幅。

另外，全國政協委員容永祺都有嚟撐場，原來藝廊老闆係佢老友兼教友。佢自爆日前率香港專業及資深行政人員協會訪台，首飾設計品牌Qeelin創意總監陳瑞麟都有份，陳生順便喺台北搞新作發布會，請嚟張曼玉亮相。容永祺巧遇大美人，話驚嘆對方美麗如昔喎。