早前施政報告建議活化工廈，十畫都未有一撇，但周一鑊就叻唔切，上月因應活化工廈計劃諗咗條屎橋，研究將空置工廈改為骨灰龕堂，仲斗膽話喺殯儀行業林立嘅紅磡區搞，聲言居民會接納啲喎！

其實呢位每月緊二十幾萬俸祿嘅周一鑊有所不知，殯儀行業林立並唔代表居民鍾意區內搞死人後事，你估對住個棺材就升官發財咩！民協嘅立法會議員KK馮檢基上月就喺立法會質詢周一鑊，指食環署每次就開設殮葬服務商店申請諮詢紅磡居民，居民都極力反對，擔心衍生環境問題。當時周一鑊即時縮窒，強調政府現階段未有既定立場，只係舉個例啫。唔係就咪講啦，擺明係衰多口。

區議員想踢走九龍殯儀館

雖然工廈改為骨灰龕堂未有定案，但紅磡居民仲未安樂得住，事關有政黨或油尖旺區議員想踢走大角咀九龍殯儀館，仲建議搬去紅磡區。又係紅磡？於是觸動紅磡區街坊嘅神經，決定喺禮拜日聯同政黨操去政府總部抗議，力阻將紅磡變成「殯儀之城」。

話就話只係建議，但呢個弱勢政府為攞票籠絡政黨，真係乜都做得出。KK擺明要力阻紅磡變成「殯儀之城」，仲警告呢個世界好公平，假如政府想討好大角咀居民歡心，就會失咗紅磡區居民嘅歡心，一定群起反政府，如果政府要搬九龍殯儀館去紅磡，就要諗清諗楚嘞！

其實KK都講得啱嘅，正所謂「己所不欲，勿施於人」，大角咀居民投訴殯儀館化寶爐造成空氣污染，紅磡區居民亦面對同樣問題，唔通紅磡區居民又建議將區內殯儀行業搬晒去大角咀咩？