話說日前慈雲山中心商場一塊玻璃圍欄突然爆裂粉碎，碎片割傷兩名女途人，其中包括一名三歲半女童。領匯職員唔單止冇幫手救人，仲叫女童外婆唔使報警，話佢哋嘅職員會報警處理。

既然領匯職員都咁講咯，婆婆咪信以為真。但等呀等，等呀等，等咗十幾分鐘之後，仍然唔見有警員到場，街坊睇唔過眼代為報警啦，先至踢爆懷疑有人拖延報案。有冇搞錯呀？依家有人受傷，後果可大可小㗎，咁都拖得就拖唔及早報警，簡直就係離晒大譜，好難唔令人懷疑係為咗掩飾事故喎。

不過故事仍然未完，領匯職員見有人受傷就翹埋手唔做嘢，但當有記者採訪嘅時候，就即刻張牙舞爪撲出，期間仲有一名神秘男子指揮領匯職員阻止記者，仲破口大罵添。嘩！差啲以為入錯地方，去咗惡人谷添呀。

領匯今次斷正，又有乜好解釋？叮，仲可以點解釋吖，唔通會認衰話佢哋見死不救，再自摑謝罪咩？一定係死撐到底啦。

領匯回應表示非常關注事件，已經向傷者慰問以及提供協助，重申領匯有定期檢查商場玻璃，並將全面檢查肇事商場咁話喎。

叮佢個鎯鎯，好心唔好擘大眼講大話啦，如果領匯有定期檢查商場玻璃，因乜事轄下嘅商場，五個月內已發生四宗爆玻璃意外？九成九係求求其其咁檢查啦，唔通鬼整咩！

領匯攞人命較飛，其實已經唔算乜嘢新聞㗎嘞。呢嗱，本報曾經獨家踢爆領匯為加設地舖出租賺多啲，封咗商場客，令傷殘人士被迫冒險用自動扶手電梯上落。本報當時已警告過遲早會出意外，但領匯一於好少理，卒之不幸言中，有兩母女連人帶輪椅碌落電梯受傷。

事實上，領匯自從接手管理大部分屋邨商場以及停車場之後，已經種下禍根，負面新聞一匹布咁長，數都數唔完。例如話對商場殺雞取卵式瘋狂加租，唔單止小商戶頂唔順，就連屋邨醫生都幾乎租唔起；仲有佢哋轄下停車場管到烏煙瘴氣，收費竟然可以加完又加，真係講都冇人信。

叮佢個鎯鎯，領匯又唔係冇錢賺，舊年逆市狂賺十八億，又話要「為顧客帶來廣受歡迎的購物體驗」，點解唔好好咁改善服務同埋設施，係都要搞到商戶民不聊生，怨聲載道？商場又陷阱重重，一而再發生意外，呢啲又係乜嘢企業責任呀？叮！

講到底，政府對領匯呢隻大怪獸無監無管，亦都係罪無可恕。所以今日太一叮要變太孖叮，一次過叮爆政府同埋領匯嘅鎯鎯至得！