尋日都講過，多得煲呔曾「親家膽」風波，令到涉嫌求愛不遂解僱前助理事件嘅白鴿黨立法會議員「甘威」甘乃威得到短暫嘅自由，但唔代表佢可以甩身，事關立法會首次提出嘅譴責議員動議，最快會喺下月初嘅立法會會議上提出。
富貴黨主席劉健儀將根據立法會《議事規則》，提出譴責甘威嘅動議，由葉劉淑儀、葉國謙同李國麟和議，其他議員唔可以修訂，佢哋尋日仲再度舉行閉門會議，商討有關字眼。
消息人士話，尋日完成咗字眼嘅最後確定，當中單係提出動議嘅理由長達版幾兩版紙，主要圍繞甘威「前言不對後語」同無理解僱女助理一事，目前等待女事主喺內容上有冇補充，估計動議將喺下周供內務委員會察悉，最快可望喺十二月初嘅立法會會議上提出。