劉校長同Ayesha無論外表同年齡都相差頗遠，加上二人背景又風馬牛不相及，政商界對呢宗婚訊都大感意外，有傳佢哋係因舊年底一齊出任經濟機遇委員會而擦出火花，如果傳言屬實，煲呔曾搞吹水會無心插柳撮合一對新人，可能係經機會成立以嚟最大兼唯一嘅成就。

Ayesha話聽到外界對佢年齡有美麗嘅誤會都好開心，佢強調自己年紀都唔細，因為佢喺畢馬威會計師事務所已工作二十一年，到九八年一月先做合夥人，佢笑言：「我幾多歲大家都估到啦！」數數手指，就算Ayesha大概四十歲，同劉校長都相差二十幾年，唔知佢哋相處時會唔會有代溝呢？Ayesha直言：「從來冇諗過呢個問題，因為同佢一齊好舒服。」至於二人係咪喺經機會擦出愛火，Ayesha就話太私人嘅問題不便回應，但其實兩人早在社交場合已經結識。

劉校長尋日出席一個論壇後，被問及訂婚傳聞時，佢隨即報以微笑並輕聲說：「係。」但問到二人是否喺經機會結緣，佢即簡潔應咗句：「唔係。」至於婚事詳情，佢乜都唔答，只係不斷向記者說：「多謝！多謝！」

兩人俱婚姻觸礁

唔講唔知，劉遵義同Ayesha麥嘉軒都經歷過情場失意，本身為美國史丹福大學講座教授嘅劉遵義，○三年獲中大聘任校長至今，當年有報道指劉上任前一年，婚姻亮起紅燈，隨後決定與第二任太太離婚，並選擇回港工作。聽會計界人士講，原來Ayesha嘅前夫係建築界人士，二人早年仲不時一齊出席公開活動，行內到依家都冇乜人知道佢哋原來已經離咗婚，所以大家對於佢再婚嘅消息感到好震驚。