喺咁惡劣嘅環境下，新嗰兩個副局長尋日履新，佢哋點樣可以洗底呢？真係各師各法嘞！

年幾前委任搞出風波嘅副局長成日畀人鬧話潛水，新呢兩個又點呢？其實，尋日晨早就有大批記者喺政府總部「恭候」，晨咁早七點幾就見到政制及內地事務局副局長黃靜文返到嚟，但佢當記者冇到咁一個箭步走咗去。做乜玩神秘？

冇幾耐就見到保安局副局長黎棟國，佢先話上辦公室先，跟住再落番嚟見記者，一開口嘅話題就係天氣，佢話天氣轉涼，叮囑大家咁早起身要着多件衫。話晒佢都係見慣世面嘅退休高官，答問時氣定神閒，仲話全民抗毒將會係佢嘅首要工作，至於接連發生懷疑掟鏹水彈，佢話希望警方盡快將狂徒繩之於法，仲呼籲市民有料要舉報。臨走前佢走上前同記者逐個握手，再三叮囑要着多件衫。

唔明記者點解咁好眼

轉個頭，又見到黃靜文坐車抵達。咪住！頭先明明見佢上咗樓㗎，因乜嘢又坐車返嚟？原來佢特登畀大家影相，仲好坦白咁承認話先前已經上咗樓，唔明啲記者點解咁好眼見到佢。嗱！請班副局長返嚟係做政治化妝師，先前嗰啲副局長連上妝都唔識，呢兩個新嘅明顯係有備而嚟，之不過，黃靜文呢個妝就化到過晒火位嘞！

其實黃靜文行番落嚟講嘢咪得囉，使乜坐車重新「出台」啫，一來未免太騎呢，二來仲打爛政府力推環保嘅齋缽，事關佢坐車再返工唔代表張相會影得靚，但佢架座駕肯定排咗唔少廢氣，造成空氣污染，咁係咪做咗壞榜樣先，佢個妝化到變咗大花面。都唔知邊個教佢？唔通係佢上司局長「林公公」林瑞麟？