小白觀點：振興旅遊業靠晒鏹魔

鏹水狂魔再現深水埗，話口未完，西灣河又嚟料，香港正式踏入鏹戰世紀，雖然好得人驚，但都不失為一個振興本地旅遊業契機。日本Bandai玩具廠為慶祝機動戰士高達出世三十周年，特別喺台場放咗個一比一元祖高達，都唔知吸引咗幾多人去參觀。

趁住鏹水狂魔出現就快一周年，明抄《搞乜鬼奪命雜作》死橋，旺角行人專用區地下突然爆出嘅唔係iPod，而係一支比國金仲要高嘅鏹水，鏹水狂魔以鏹水死光射吓一架警方裝甲車，射吓又一架直升機，喺危急關頭，煲呔曾呢個香港人嘅真朋友出現嘞，仲用白色慳電膽笠頭扮救世主擊潰鏹魔。二十一鏹戰世紀，仲唔係煲呔曾嘅世紀咩。

網友觀點...X）...

[　世界仔　]

要戴頂好似隻鑊咁大嘅防鏹鐵帽出街至得啦。

[　永　樂　]

黐線佬掟開有癮，行邊條街都死，政府不如改建地下街啦。

[　jessica　]

我以後行商場算喇，好可怕，點知下次掟咩落街呀！

[　Wendy　]

深水埗最多阿公阿婆，淋鏹水佢哋點走啫，香港咁多差佬，叫差佬日夜駐守，嚇吓啲變態佬都好吖。

網址：www.sunsiupak.blogspot.com

阿豪觀點：煲呔曾應到黑點視察

旺角、深水埗接連出現鏹水彈狂徒，警方基本上可以話係束手無策。點知話口未完，西灣河又話整多單鏹水彈「恐襲」事件，問你怕未？

計我話警方係「非不能也，實不為也」。大家諗吓，如果煲呔曾話落區巡視，雖然會多咗好多人想從高空掟腐蝕性液體洩憤，但係我敢輸賭，一定唔會出現鏹水彈狂徒。只要煲呔曾耐唔耐去鏹水彈黑點視察，肯定天下太平嘞！

豪伯估計，呢個可能係政府因應近排樓價係咁狂飆而推出嘅措施。大吉利是講句，如果你住嗰區三日唔埋兩日就有人被鏹水彈掟親，邊個仲夠膽喺度買樓？到時莫講話七萬蚊呎，七百蚊都冇人要啦！

網友觀點...X）...

[　鼓　神　]

掟嘢落街的人都係懦夫，一味照抄人掟嘢。搵人掟紙飛機落街，懦夫會照跟，又安全又好玩。

[　MARY LEE　]

鏹水佬掟完旺角，依家轉去深水埗，遲早玩轉全港十八區，今次真係玩殘班警察……

[　車　神　]

掟錢落街仲過癮啦，掟嗰個又可以發洩，途人又開心……不過，記得千祈咪掟硬幣喎！

[　特警成　]

其實警方都好難o架，你哋諗吓，又冇明顯犯罪動機，又可以周圍走去掟嘢，講真都唔易捉。

網址：www.lukchiho.blogspot.com