呢嗱，施政報告致謝動議經過立法會一連三日辯論，尋日卒之被議員投票否決咗，真係瘀到爆呀！畀着第二個，附近搵唔到個窿捐，都立即匿落枱底唔敢見人啦，但係對於面皮成丈厚嘅煲呔曾嚟講，又有乜所謂吖，一不離二，二不離三，佢呢方面嘅經驗已經豐富到極！

煲呔曾上任以嚟總共發表咗五份施政報告，計埋呢份，竟然有三次唔獲得通過致謝動議。埋單一計，哎吔，醜死鬼咯，成功率唔夠一半喎，同老董半斤八両。

查實今次致謝動議唔獲得通過，根本就係意料中事，因為呢份報告確實衰到冇朋友，一味炒冷飯，扶貧紓困措施影都冇，基本上就係一份「百無報告」。咁都算啦，最難頂嘅係，爆埋單慳電膽益親家醜聞，難怪令到全城民怨沸騰喎。

最搞笑嘅係，煲呔曾唔衰攞嚟衰，疑似利益衝突醜聞搞到滿城風雨，佢仲心存僥倖，以為考慮取消加電費以及將現金券適用範圍擴大至其他節能產品，咁就可以淡化事件。唉，正所謂「覆水難收」，邊有咁易吖？

事實上，睇番近日各式各樣嘅民意調查，煲呔曾民望插水，仲好睇過奧運跳水比賽。呢，中大亞太研究所日前公布最新民意調查，受訪市民對施政報告嘅評分跌至四十六點五分嘅不合格水平，係煲呔曾歷來最低分嘅一份施政報告。

而煲呔曾嘅個人民望，亦都好似食咗瀉藥咁，跌到只係得番五十一點一分，由於調查結果仲未反映「雷曼弟婦」事件以及佢發爛渣誣衊傳媒「無中生有」嘅負面影響，否則可以批死煲呔曾以及政府民望直插水底都得。

話時話，太一叮真係晒頭，立法會因乜解究年年如是，係都要搞個施政報告致謝動議，基本上係齋吹水，致唔致謝都一樣，議員辯論三日，唔計高官嘅勁高薪酬，知唔知浪費咗幾多燈油火蠟？為咗環保大業，呢啲門面工夫要唔要都罷啦。

再講吖，以前係殖民地冇得好講啦，議員揸頸就命要喺英國佬面上貼金啫，問題係依家係乜嘢世界呀？港人治港呀老友！煲呔曾做得好係應份嘅，做唔好就抵鬧，更何況呢份施政報告完全冇料到，致乜鬼謝吖！

不過煲呔曾唔好傷心住，雖然話致謝動議畀人否決咗，仲有一個民間自發性嘅動議等住嚟。嗱！聽日十一月一日，肯定好多小市民都會舉腳支持，係乜？之唔係全民要「燈膽權落台」嘅動議囉！叮！