小白觀點：患被陷害妄想症
煲呔曾被全城狂插佢親疏有別，當堂黑口黑面話人哋無中生有屈佢。唉！好心佢與時並進一下啦，呢個時代點會仲有人咁屈人㗎，要惡言攻擊詆毀對手，使鬼花咁多心機，鐵證如山咁踢爆慳電膽益親家、家有雷曼弟婦吖！
查實今時今日要特登捏造事實，簡單到極，梗係由網上討論區入手啦！之但係，直至目前為止，你有冇見過有閒人喺網上發「愛滋曾自爆濫交報復」嘅帖吖？冇吖嘛！
話時話，反正煲呔曾睇怕都唔坐得幾耐，不如轉行撈物流搬運啦，搵埋鬍鬚曾做跟車拍檔，叫做「曾曾搬屋」，兩條友豎起手指公，打正旗號「搬屋搬糖搬公帑，穩健猶如親自輸送」，生意一定滾滾來。
網友觀點......
Tofu仔
踢走個老懵董，嚟個特衰權，香港人真係冇運行。
Locker
煲呔曾用人唯親，奸到出汁，小市民再畀佢咁玩法，只會生活更艱苦。
逢人超
金融海嘯咁大鑊，我哋都係靠自己捱過去，政府都冇做過嘢幫市民，班官淨係得把口飲紅酒。
龍爺
煲呔曾，你都係時候腳痛啦！
網址：www.sunsiupak.blogspot.com
阿豪觀點：早諗定下台藉口
煲呔曾今次都算大鑊喇！有團體將會喺聽日搞倒曾大遊行，喺報紙見到啲人連海報都出埋，呼籲大家當日齊齊喺禮賓府集合。坦白講，其實張海報都幾有創意㗎：一個煲呔喺上面，下面就係一個倒轉咗嘅「曾」字，遠望埋去似足一個苦口苦面戴眼鏡嘅人倒轉咗咁。
依家好多人都同意，話煲呔曾仲衰過老董，起碼老董只係衰無能，冇利益輸送吖嘛。但計我話，大家咁諗實在太睇小煲呔曾，起碼煲呔曾聰明好多，佢初初上台時已經講到明，自己飽受骨刺之苦，做好晒鋪排工夫，要起藉口上嚟，劇情都冇咁犯駁。
仲有呀，煲呔曾一開波就講明退休後會去外國生活，似乎一早已經預咗香港人會唔like佢咁喎……
網友觀點......
大白
畀市民質疑誠信，煲呔曾做落去仲有咩意思呀？
伊藤開司
我估家陣煲呔曾肯定希望全城倒曾熱會好似「全城清潔運動」咁虎頭蛇尾！
曾濫權
十一月一號好似有倒曾遊行喎，之前都好似未試過打正旗號搞倒曾遊行，睇嚟煲呔曾今次大鑊喇！
豬牛嬸
唓！你班閒人就算嘈到拆天都冇用啦，人哋視民意如浮雲㗎，再嘈告你哋誹謗添呀！
網址：www.lukchiho.blogspot.com