多名大學校長尋日出席一個論壇，浸大校長吳清輝一嚟就訴苦，話浸大做咗股市大閘蟹，名副其實係金融海嘯受害者。到底浸大入市買咗乜？吳校長苦笑話，押注時「樣樣有啲」，冇買殺人唔見血嘅雷曼，投資組合睇落算係保守，估唔到咁穩陣都蝕入肉。
浸大投資「血流成河」，校董會成員第一件事梗係「止血」啦，可惜金融海嘯百年難遇，入市博反彈難如踩鋼線，為免泥足深陷，惟有當機立斷斬纜，將筆錢轉去更保守嘅投資，但調整組合呢個決定就令佢更後悔。
事關過去半年全球股市拗腰式反彈，港股由萬一點低位彈番上二萬二千點，大笨象亦由低位三十幾蚊反彈上番八十幾蚊。照咁計法，如果浸大當日按兵不動，且繼續喺低位掃貨，莫講話返「家鄉」，直頭可以倒賺幾億銀。難怪吳校長慨嘆話一來一回足足賺少咗十幾億，認真唔抵。