話說全體議員表決施政報告致謝議案，由支持嘅議員先舉手，成班建制派議員一齊行動，點知長毛可能太心急要否決動議，人舉佢又舉，竟然「支持」向施政報告「致謝」，立法會同僚見到長毛同建制派打成一片嘅奇景，即刻噪動起嚟，長毛立即成為繼煲呔曾後畀人噓得最勁嘅一個。

長毛亦知舉錯手，雖然彈弓手收得快，但已經瘀爆，跟住將個頭伏喺枱面，好似唔敢見人咁款，旁邊佢嘅社民連黨友「大舊」陳偉業亦瘀埋佢一份，攞起個微型棺材示威道具，作狀扑向長毛個頭，可能係提醒佢以後帶腦返議會。

投完晒票，長毛嘅失魂繼續畀人攞嚟當笑話，立法會主席幽佢一默，話經過三日辯論，只係得一個官員身體不適，同埋一位議員舉錯手啫！即引嚟哄堂爆笑。