喺香港地產界打拚逾六十年嘅協成行主席方潤華，稱得上係老行尊，更有「撈底王」稱號，但喺舊年金融海嘯衝擊下，佢同阿仔方文雄話暫時只敢採取保守策略，唔敢貿然入市。事隔一年，方潤華最近再度出招，掃咗兩個豪宅單位，涉資五千五百幾萬元，阿仔仲話兩個單位並非作炒賣用途，希望長線投資，現時已經放緊租。
對於政府「賣大包」放寬工廠大廈用途限制，工廈身價隨即水漲船高，原來協成行手頭都有工廈，一幢全資擁有，另一幢就同「四叔」李兆基嘅恒基共同擁有，兩幢工廈都位於香港仔。
方文雄話暫時未有打算向政府申請改變工廈用途，事關唔想好似外界咁一窩蜂去申請改變用途，希望睇定啲市場需求至再作決定。方文雄果然盡得父親真傳，作風夠晒穩健喎！