恒基主席「四叔」李兆基尋日去廣州南沙出席培華教育基金舉辦嘅中國發展論壇，問佢係咪想阿仔家誠追番個男丁，佢笑笑口咁話：「係呀，佢（家誠）追緊㗎喇，依家要抖抖先，唔會咁快㗎嘛！」咁幾時「開工」呢？佢老人家果然好體貼：「普通女人開刀生仔，都唔能夠即刻再嚟啦，等佢（徐子淇）休息一年半載先再嚟另一個囉！」
四叔喺「為人民服務」環節同嘉賓分享心得，仲話美金淡，港人持有港元亦被拖累，加上依家存款又冇息，可謂焗住畀美國人賺到盡，所以港人為防止資產縮水，可考慮購實物，買地產、物業、揸澳元，總之持有保值嘅資產，就可對抗通脹。
講到點睇後市，四叔話跌到二萬一千點應該有支持，但近排個市都係上上落落，佢會繼續揸住自己原則，唔會買亦唔會沽。佢仲話依家投資地產最啱時候，投資地產有機會搵大錢，着數過投資股票。