睇睇五張新面孔，真係同以前嘅組合好唔同，有兩個係「賓架」，分別係渣打高層洪丕正同恒生一姐梁高美懿，另外三個係專業人士，包括前行會成員廖長城嘅細佬廖長江、律師會前會長黃嘉純同埋一代巨星「哥哥」張國榮最錫嘅姨甥女麥嘉軒。任期由下個月七日開始，任期三年。

喺金融海嘯衝擊下，早前好多大學校長都話撲水難，除籌款大減之外，仲要諗計揼啲舊校友心口捐錢，咁港大吸咗兩大銀行嘅高層入校董會，佢哋喺財經界人脈咁廣，應該可以幫港大拓闊水源，同埋幫啲大學生爭取多啲喺銀行實習嘅機會。

至於黃嘉純係教統會成員，今次再獲委入港大做校董，佢嘅公職之路似乎同教育有好深淵源；麥嘉軒早前先完成經濟機遇委員會嘅工作，依家仲身兼婦女事務委員會成員等，佢自言由細到大都喺英國受教育，今次獲委任做港大校董都算係新嘗試。睇嚟佢兩個大有邁向新一代公職王之勢。