咁講，梗係辣㷫梁美芬啦，搞到梁美芬事後澄清話個袋係「Tiffany & Fred」，名牌嚟㗎。之不過，捧隔籬黨、踩自己友，呢啖烏氣點啃得落呀？

捐五萬畀扶貧基金

同門內訌，真係唔講得笑。雷曼石事後可能收到風，於是立即向梁美芬「沙冧」，仲負荊請罪，話不如送番個袋賠罪啦！點知梁美芬唔領情，話屋企大把袋。人家唔受呢套，咁點補飛呢？跟住梁美芬竟然順水推舟，叫雷曼石捐錢做善事就算數啦！仲叫佢捐去佢有份搞嘅扶貧基金，於是雷曼石就自揼心口捐咗五萬蚊，氹番盟友。

嗱！呢啲咪自己攞嚟衰囉，講錯一句嘢就唔見五萬蚊，衰多口累事啦。不過，以佢抬舉隔籬黨魁嘅手袋都價值十幾二十萬蚊，依家五萬蚊就了事，可以修補裂痕？以佢上等人嘅身份，出手係咪低咗啲呢？定係佢心諗有賺？

「雷曼弟婦」事件被質疑「私了」前車可鑑，雷曼石學精咗，尋日係辯論中攤開嚟講，仲公開道歉，話唔應該喺發言時提及兩個女同僚嘅名，仲話當時因為見唔到盟友個袋有個「T」字，唔知嗰個袋係名牌，根本唔係廟街貨，所以決定捐錢做善事嚟道歉。

可能係反射心態，梁美芬尋日好似示威咁，以一身Celine套裝現身立法會，手挽七千蚊名牌袋Etienne Aigner，仲戴住隻幾萬蚊嘅鑽石手錶，全身行頭加埋貴過一個普通打工仔成個月人工，話畀人知佢唔係「廟街皇后」。