申訴專員黎年點名批評地政總署對投訴人「態度敷衍、不負責任」。睇吓佢哋做嘢幾離譜，就知點解申訴專員咁扯火嘞。有市民一九六三年喺新界買咗幅農地，業權從來未轉讓過畀人，直到二○○○年因為收唔到差餉繳費通知書，向地政總署查詢至發現，塊地原來已經唔屬於佢，轉咗去四個陌生人名下。

苦主同對方三唔識七，咁大整蠱，你估大衞高柏飛變魔術咩，好明顯係有人搞錯啦。不出所料，原來一九七五年嘅理民府職員擺烏龍，錯誤將苦主幅地納入另一份轉讓契約。

真相大白，解鈴還須繫鈴人，地政總署好應該主動「撥亂反正」，搞番掂吖。點知佢哋變咗好似局外人咁，苦主由○四年起委託律師四次要求地政總署跟進，佢哋竟然回應話，政府唔係契約當事人，唔可以糾正錯誤，叫苦主自己透過法律手段更正註冊紀錄。投訴人○七年向申訴專員公署求助，公署調查後認為錯不在投訴人，結果土地註冊處要發表聲明，並更正業權。

叮！唔係啩？搞到人哋雞毛鴨血嘅係政府噃，道歉都冇句，要苦主自己出錢搵律師討回公道，嗰幅地本來就屬於佢，業權同他人無關。本來即刻可以糾正嘅錯誤，一拖經年，地政總署有錯唔認，有責就卸，唔止係縮骨，更加係卑鄙。

講開地政總署敷衍投訴人，十隻手指數唔晒。呢嗱，沙田下禾輋村舊年十月發生三級大火，八間村屋變成頹垣敗瓦。建築物料原來含有可引致肺癌嘅石綿成分，地政總署過咗成年都未清理火災現場，求其搵木板同鐵絲網圍住就算數。試問如果有市民中招，呢隻鑊係咪地政總署署長譚贛蘭孭先？

叮！佢有佢拖，你死你事，已經係政府部門一貫作風，否則港府民望唔會跌到阿媽都唔認得。中大亞太研究所最新調查顯示，三成一受訪市民唔滿意港府嘅施政表現，短短一個月，數字就上升咗近百分之九。

港府施政交晒白卷，市民嘅評價愈來愈負面，一啲都唔出奇。淨係最近呢一年幾，外傭稅、生果金、雷曼迷債、泰國包機、校園驗毒、部分公務員變相加薪，仲有嗰隻唔衰攞嚟衰嘅慳電膽，衰完一鑊又一鑊，港府幾時做過齣好戲畀市民睇吖？

煲呔曾個黃昏政府，大事冇魄力做，小事冇心機做，個個部門萬事以拖為上，有責以卸為先。地政總署明明自己犯錯，都要市民孭飛，旨意港府有作為？慳啲啦。叮！