小白觀點：死撐經濟回光反照

勞工處張貼過期廣告充撐場面，扮到成個就業市場一片好景咁款，終於明白點解前排有人見到有個招聘啟事，識兩文三語都係得四千。唔係講笑呀，呢份工隨時係清末民初嗰時貼落，人工唔係少㗎，四千袁大頭銀元呀！

咁又係嘅，招聘壁報板同豪宅唔同，得頂層零星幾張、底層三兩份工搵人，中間吉咗幾層，又真係幾覺眼㗎，你知啦，鬍鬚曾同傻強成日出嚟話經濟回光反照，點可以空框框咁失禮呢！問題係，依家搞到好多搵工仔摸門釘空歡喜一場，未免太冇品喇。想填滿啲吉位之嘛，話都冇咁易啦，反正裝假狗，求其喺超市掹幾張「尋黑色唐狗一隻，厚酬」頂上咪算囉。

網友觀點...X）...

[　mm　]

又話家陣經濟好咗嘅，點解仲要整色整水？呢個政府真係無藥可救呀！

[　June　]

分明就係懶啦，佢哋班官高薪厚祿，點知你哋小市民冇工做過唔到日子係幾慘呀！

[　豬人　]

收到職位資料又唔即刻登出嚟，成日拖得就拖，靠勞工處搵工聽餓死啦。

[　ming　]

聽聞依家有二十萬人冇嘢做，呢個煲呔曾就爽啦，一味只係開副局長益自己友，快啲落台啦！

阿豪觀點：執到「筍工」喊三聲

以為明星至要裝胸作勢呃吓人啫，估唔到勞工處都興呢味嘢。試過有人寄出求職信後，先至知呢個位早已經請咗人，仲畀對方窒番轉頭，話佢哋已經將資料交咗畀勞工處好耐，點解依家至嚟申請喎！

不過計我話，就算勞工處介紹嘅係真工咁又點吖，好似早排勞工處網頁登咗份「筍工」咁，只要求中三學歷，略懂英語，每周五天工作，每日工作六個半鐘，唓，原來係卡拉OK女伴唱；勞工處網頁之前嘅另一「筍工速遞」，係一間補習社請打字員，一個月得二千蚊人工咁大把。

所以呢，勞工處都係唔使裝假狗裝得咁辛苦喇，索性轉做《警訊》，教打工仔唔好誤信網上求職廣告好過啦！

網友觀點...X）...

[　尖子　]

勞工處搵工幫唔幫到手就唔知，但係依家想搵份工真係唔係咁易……一啲都唔覺得勞工市場好轉囉。

[　Johson Lo　]

好難講嘅，一個願打一個願捱，冇人做嘅話，又點會有呢類工作存在呢？

[　人中之龍　]

識兩文三語搵得嗰四千蚊？咪玩啦！咁我點解唔去做外傭呢？起碼有食有住吖！

[　卜勤仔　]

勞工處登過期招聘廣告，咁做同派發過期發臭食物畀災民有咩分別呀？