立法會尋日繼續辯論施政報告致謝動議，林鄭本來有兩個環節要出嚟答辯，點知立法會主席宣布林鄭病咗，仲幽佢一默話局長不嬲好打得，希望佢快啲病好，返嚟再打過。

老實講，外界覺得煲呔曾新一份施政報告，十足十係林鄭嘅施政報告。點解？事關好多瓣重頭戲都壓落林鄭身上，好似中環保育、活化工廈同土地供應等等，搞到佢頻頻撲撲四出解畫。

林鄭病咗，於是由財爺鬍鬚曾同環境局局長邱騰華做替工，答埋佢嗰份。林鄭平時喺立會答辯多數都好長篇，仲會臨時爆肚，而鬍鬚曾只夾雜講咗兩段活化工廈，邱騰華講保育都唔夠二百字，將林鄭份工完全隱沒晒。

好打得唔係代表打不死，尤其林鄭冇副局長，想搵人頂更做替工都唔得，再加上唔知煲呔曾有心定無意，係咁加嘢落去，唔打殘遲早都做殘啦。