泛民主派研究透過五區總辭變相舉行公投，挾持民意同中央抗衡，一向語出驚人嘅金融服務界代表「金勞詹」詹培忠尋日又提出個大膽建議，話如果真係有五名泛民辭職，佢定會搶住做第六個，然後再空降港島區參選，畀選民多一個選擇，連競選口號都諗埋，叫「頂籠呃你一票！」。
金勞詹預言泛民喺五區補選中隨時會輸兩席，因為做過九龍東票后嘅工聯會陳婉嫻已熱晒身準備出戰，而工聯會會長兼行政會議成員鄭耀棠亦唔排除今次會真正出選。如果結果真係咁，泛民嘅如意算盤一定打唔響。
全無地區直選經驗，點解金勞詹講得咁有信心呢？事關佢睇死泛民一盤散沙、內訌不絕，根本唔會搞得成五區總辭，二十三人總辭更加係癡人說夢，就算只係二仔底，都唔怕同對方晒冷！佢早前去拉斯維加斯搏殺，最後贏咗千幾萬港紙返嚟，泛民想同佢賭鋪勁，想唔輸甩褲都幾難。
金勞詹仲話建制派今次撐嘅係中央同整體特區政府，唔係煲呔曾個人，又炮轟煲呔曾當年未上任就誇下海口話要落實「強政勵治」，好似未開波就話自己贏硬五比○咁，點知一落場就踢到亂晒坑，最終要靠阿爺同其他人撐佢，真係令人O晒嘴。